يا جر قلبي جر لدن الغصوني
وغصون سدر جرها السيل جرا
وأهله من أول بالورق يورقوني
على غدير تحته الما يقرا
على الذي مشيه تخط بهوني
والعصر من بين الفريقين مرا
لا والله اللي بالهوى هوجروني
هجر بها الحيلات عيت تسرا
لا مبعد عنهم ولا قربوني
ولا عايف منهم ولاني مورا
وأكثر عذاب القلب يوم سنحوني
بيح بصبري لو بغيت اتدرا
لا ضاق صدري قمت اباري الضغوني
كني غريب بالدلوهة مضرا
وقلبي عليه اشفق وتبكي عيوني
والحال من ود الحبيب تبرا
يا عزتا لي من تفرق شطوني
يعزا لي ارمي بالسلب واتعرا
ان مت في خد بعيد انقلوني
على هدي الزمل مشيه تدرا
ان مت في دافي حشاه ادفنوني
في مستكن الروح ما هوب برا
بين النهود وقدّ روس القروني
عن الهبايب مستكن مذرا
يا ليتهم بالحب ما ولعوني
كان ابعدوا عني بخير وشرا
ولا انهم يوم انهم قربوني
خلوني اقضي حاجتي واتدرا
ويا ليتهم في الدرب ما واجهوني
ويا ليتهم ما زادوا الحر حرا
ويا ليتهم عن حاجتي سايلوني
يون اني اقعد عندهم واتحرا
الخد برق في علو المزوني
تقول براق من الصيف سرا
وقفت عنده شابحات عيوني
كني غرير باللهاوي مضرا